രണ്ടാം ക്ലാസ്സുകാരൻ ക്വാറന്റൈനിലാണ് .
രണ്ടാം ക്ലാസ്സിലെ കുട്ടിക്ക് പത്താംക്ലാസ്സുകാരന്റെ
ബുദ്ധിവേണമെന്നു അമ്മക്ക് നിർബന്ധമായിരുന്നു .
കുട്ടിയുടെ ഭാവിയിലേക്ക് തീ കോരിയിട്ട
വൈറസിനെ അവർ ദിനംതോറും ശപിച്ചു .
ആളുകളുടെ ശ്വാസകോശം കുടിച്ചു ചീർത്ത കൊറോണ
അവനെ തികഞ്ഞ ഒരു അലസനാക്കിയിട്ടുണ്ട് .
പഠനത്തിൽ മുൻപത്തെ ശുഷ്‌കാന്തി ഇല്ല .
തന്റെ കണ്ണുവെട്ടിച്ചു ഫോണെടുത്തു ഗെയിം
കളിക്കുന്നതിലാണ് ഇപ്പോൾ സദാ ശ്രദ്ധ .
സ്കൂളിലെ ഏഴു മണിക്കൂർ നീളുന്ന പഠനമാണ്
ടിവിയിൽ ഒരു മണിക്കൂറായി വെട്ടിച്ചുരുക്കിയത് .
അവർ വ്യാകുലപ്പെട്ടു .
സംഗീതം, നൃത്തം, ചിത്രംവര എന്നിങ്ങനെ
സകല ക്ലാസ്സുകളും മാസങ്ങളായി മുടങ്ങിക്കിടപ്പാണ് .
പഠനത്തിൽ നിന്ന് തെന്നിമാറാതിരിക്കാൻ അയലത്തെ കുട്ടിയുമായി
ചങ്ങാത്തമുണ്ടാകാതെ സൂക്ഷിച്ച തന്റെ ക്രാന്ത
ദർശിത്വത്തിൽ അവർ അഭിമാനപുളകിതയായി .
ഇല്ലെങ്കിലിപ്പോൾ അപ്പുറത്തു പോയി ഓടിക്കളിച്ചു
മുറ്റം മുഴുവൻ വൈറസ് നിറച്ചേനെ.
പഠിത്തത്തിൽ കെങ്കേമനാകാൻ ,
ഭാവിജീവിതം ധനലബ്ദിയിൽ ആറാടാൻ
നല്ലനാളുനോക്കി ഡെലിവറി ഡേറ്റിനു മുൻപ്
വയറു കീറി പുറത്തെടുത്തതാണ് .
നക്ഷത്രക്കണക്ക് പിഴക്കില്ല .
അവർ ആശ്വസിക്കാൻ ശ്രമിച്ചു .
അച്ഛന്റെ നഷ്ടപ്പെട്ട ജീവിതവും
സ്വപ്നവും തിരിച്ചു പിടിക്കേണ്ടത് അവനിലൂടെയാണ് .
സ്കൂളിലേക്ക് അവന്റെ പ്രായത്തിൽ കിലോമീറ്ററുകൾ
നടന്നു പോയ കഥ അച്ഛനോർമ്മിപ്പിച്ചു .
മുറ്റത്തു ഹോണടിക്കുമ്പോൾ ബസു വരുന്നയത്ര
സർവ സുഖസൗകര്യങ്ങളുമൊരുക്കിയാണ് നിന്നെ പഠിപ്പിക്കുന്നത് .
നീ പഠിച്ചാൽ മാത്രം മതി .
അച്ഛൻ കണ്ണുരുട്ടി .
അപ്പൊ അവന്റെ സ്വപ്നങ്ങളോ
അവനാശിക്കുന്ന അവന്റെ ജീവിതം അവന്റെ മകൻ ജീവിക്കും
അതാണ് സ്വപ്നങ്ങളുടെ രീതി .
അച്ഛൻ വിക്ടർസ് ചാനൽ ഓൺ ചെയ്തു വെച്ചു.
രണ്ടാം ക്ലാസ്സുകാരൻ ക്വാറന്റൈനിലാണ് .
മുട്ടിലിഴഞ്ഞ് നടക്കാൻ തുടങ്ങിയത് മുതൽ
ഇപ്പോൾ രണ്ടാം ക്ലാസ്സിലിലേക്ക് കയറിച്ചെന്നത് വരെ അവൻ ക്വാറന്റൈനിലാണ് .
©aswathy
Comments
Post a Comment